SSRİ xalq artisti Müslüm Maqomayevin cənazəsi bu axşam Bakıya gətirilib. Bu gün Müslüm Maqomayev Fəxri Xiyabanda torpağa tapşırılacaq.
SSRİ xalq artisti Müslüm Maqomayevin cənazəsi bu axşam Bakıya gətirilib. Xüsusi təyyarə «Azərbaycan Hava Yolları» aviaşirkəti tərəfindən prezident İlham Əliyevin tapşırığı ilə ayrılıb. Əfsanəvi musiqiçinin həyat yoldaşı Tamara Sinyavskaya da həmin təyyarə ilə Bakıya gəlib.
Heydər Əliyev adına beynəlxalq hava limanında matəm ovqatı var idi. Cənazəni gətirən təyyarəni mədəniyyət və turizm naziri vəzifəsini icra edən Əbülfəs Qarayev, Bakı Şəhər İcra Hakimiyyətinin başçısı Hacıbala Abutalıbov və digər rəsmi şəxslər, ziyalılar, incəsənət xadimləri qarşılayıblar. Müslüm Maqomayevin cənazəsi xüsusi avtomobilə - katafalka qoyularaq, paytaxtın Əjdərbəy məscidinə gətirilib. Sonra cənazə Dövlət Filarmoniyasına aparılacaq. Oktyabrın 29-da isə orada məşhur sənətkarla vida mərasimi keçiriləcək. Müslüm Maqomayev Fəxri Xiyabanda torpağa tapşırılacaq.
Xatırladaq ki, dünya şöhrətli həmyerlimiz Müslüm Maqomayev oktyabrın 25-də Moskvada uzun sürən ağır xəstəlikdən vəfat edib./ANS PRESS/
